Ei dan Gruba,
Huch durt uba,
Ei dan ala,
Vulgeschneita,
Haust a schunt seit ala Zeita.

Uff derr Kuppe
Satt errn hucka,
Huch voo druba,
Rundergucka.

Hurch, jitz kimmt a,
Hurch, jitz nimmt a
Seine Keule,
Und macht a Geheule,
Und macht a Gepulter!
Woas? Stiehn blein wullt err?
A werd euch brenga,
A werd euch hänga
Huch ei die Fichta,
Macht nich Geschichta.

Hurch, jitz roast a
Über die Berge,
Duckt euch, ihr Zwerge!
Jitz gieht die Joad
Übersch Huche Road!
Hurcht ock, wie doas heult und fefft,
Satt ock, wie a nooch ins grefft,

Satt ock, wie die Naabelfetza
Über Steene und Kniehulz hetza,
Eis Biehm´sche nüber
Und wieder rüber,
Immerfurt, immerfurt,
Durt.

Hexa koan a,
Wißt err doas?
A macht aus Wosser blankes Gloas.
Die Kühe verhext a,
Die Pflauma eim Goarta,
A koan sich verwandeln
Uff olle Oarta.
Steene nimmt a und macht se zu Gulde,
Und wenn a groade, doß a wullde,
Und a hotte die gude Jacke oan,
Doas muuß ma soan,
Doo hott´ a Erborma
Und goabs a Orma.

Rübezoahl, Rübezoahl!
Kimmste nich amoll eis Toal?
Wu ies denn deine Liebste hien?
Doas Madel woar doch werklich schien!
Ach su - die hoot dich nich gemucht?
Verpucht!
Jitz heeßts aber renna,
A wird ins erkenna,
A kimmt schunt gerannt,
A hoot ins erkannt!
A wird in packa
Hinga beim Nacka!

Werd a ins kriega!
Oh kännt merr fliega!