Sieba Tage Raan.
Wu maags uff derr Welt noch a treuges Platzla gan?
Noß ie derr Puusch und noß sein Äcker,
Voo früh bis obends gieh doas GEklecker.
Niederträchtiches Water doas!
Ma hopst ei die Fichta, ma setzt sich eis Groas,
Klatschenoß ies olls,
Die Jauche stieht ehm bis onn a Hols.
Und wu ma hienkimt onn olla Ecka.
Kricha die Viehcher, die schworza Schnecka.
Hinte a Stücke, munne a STücke,
Übroale trifft ma die äkliche Klicke,

Und tritt ma uff eene,
Doo glitscht ma aus und bricht Hols und Beene.
Und Giftpilze schissa jitz ei die Hüh,
Bale rut wie Blutt, bale weiß wie Schnie.
Und immerfurt loatscherts und immerfurt
Is hoot überhaupt noch nicht uffgehurrt.
Doo hilft kee Ärgern, kee Schimpfa, kee Gräma
Ma werd sich als Hoase noch müssa zum Schwimma
gequäma.

Moolt euch eenzich doas Bild jitz aus,
Wie merr olle warn ruderns üms Fäschterhaus!
Om Ende wachsa ins goar noch Flussa.
Doo warn merr geanget onstotts geschussa.
Und kumma zuletzte noch uff a Tiesch
Als gebrotner Fiesch.

Spoß beiseite, die Sache ies ernste,
Hier heeßts blus: Woas de nich konnst, doas lernste.
Ätsch, - doas kleckert ehm bis a Schlung!
Hoots denn nich bale gesäut genung?
Sul denn doas wetter giehn Moonda und Wucha?
Ma kriegt ju is Reißa ei olle Knucha.
Stillem iech rädt miech ock bluuß ei die Buust,
Ess wiel ieche gleeba: und doas ies mei Truust,
Doo maags meineswägen jitz rann oder schnein,
Derr Färschter sul gestern ersuffa sein!
Stimmt doas, doo hoa iech om längsta gekloat,
Doo hoot dich die Schweinerei Zweck gehoat .